اموال - Money - 3

فلوس من التصوير " 3 "

إن أحببت التصوير فيجب أن يحبك التصوير ، الحب معناه فلوس ، اقوي فتور ممكن يحصل  من التصوير لما متلاقيش جاب همة ، هتصرف علية قد أية ، سنة أتنين وبعدين ؟

دى مشكلة فعلا أرقتني فترة طويلة من العمر ، بحبة بس عايز كثير ، آية الحل ?

أكيد الحل إن التصوير يصرف على نفسه بنفسه ، على الأقل ألاقى منة عائد ، شهرة ، انتشار وبدأت الشغل ، وطول فترة طويلة جدا وقعت ووقفت وتعلمت واليوم بنقل لكم الخبرة الطويلة بأدوات جديدة ، فقط ليكم .

بناء عن المقالة الأولى والثانية عرفنا القاعدة الأساسية إلى هنقف عليها للانتشار ، لازم يكون في قاعدة مينفعش ابني مبنى من غير أساس وقواعد ، نصور صح نغلف صح والآن جاء دور نعلن صح ، المقال طويل فصبرجميل مع بعض .

ايون أنت لازم تعرف أزاي تعلن عن نفسك ، الفارق بينك وبين أي شخص أخر الإعلان وجودة الإعلان للمنتج ، مهما كان منتجك رائع ، مفيش إعلان ، مفيش وجود ، فدى حقيقة لازم تؤمن بهى وعلى مقدار تعبك في الإعلان عن نفسك بعد مراحل التصوير " سالفة الذكر " على مقدار صعودك إلى النجومية ، إلى السطح لتنكشف للجميع .

طيب نعمل ايه ؟

أولا: لازم نعرف إن أي جملة تقال هتنفع لمجالات كثير فنية لكن بتخصص للتصوير ، والأمر المطروح حاليا لكل العرب ، كل العرب بدون استثناء يقدروا يعملوا كده حتى التسجيل بالرابط أخر المقالة ، خطوة بخطوة مع بعض وبسهولة هنوصل بسرعة .

أول حاجة عشان تعلن عن منتج لازم اسم " براند " بالمسمى العصري ، أنت براندك أسمة ايه ، لول ، حكشة ، الفحيت فوتوجرافر ، مش بهرج هنا ، لا ده اسم ينفع براند ولا ينفع شخص أصلا خليك ذكى .

الأساس

اسم المنتج ممكن يقترن باسمك ، أو صفة باسم المهم تبقى دالة على الشغل المقدم ، إحنا دلوقتي هنبنى أول أساس في العمارة الكبيرة إلى هانعملها ، حط الأساس صح .

أمثلة للأسماء

Name – Studio اسم مع وصف

Name – Photographer اسم مع وصف

Describe – Photo's صفة مع وصف

تمام وصلت للأسم " مش مصيبة يعنى إنت اخترته وتلف على كل البشرية تاخد رايهم متقعدش تفكر كثير المهم الشغل نفسه إلى وراه "

الدور الأول :

نعمل لوجو " Logo " وياريت بعد إذنك لو سمحت يبقى باسمك فقط ، اسمك وبس ، بلاش حركات الرسم والصور في اللوجو والكلام ده أنت حاطت اللوجو على صورة متعمليش حاجات متداخلة وبعدين تحط الصورة على الصورة ، قصدي اللوجو على الصورة ، مش هيبان ويبقى عنصر غير جذاب .

اختار لون ابيض للصور الغامقة ، واختار لون اسود للصور الفاتحة ، بمعنى انك لما تعمل اللوجو إلى هو اسمك أعملة لونين ابيض واسود ونتفرج على أمثلة

بلاش احمر ، بلاش ألوان غريبة ، ملكش دعوة بحد امشي وري كلامي تكسب .

الدور الثاني

بانر الصفحة ،  لازم يكون بانر احترافي ، بانر يدل على إن المنتج الموجود في الصفحة حاجة كده فخمة ، مش حاجة يع متهربش الزبون من وشك من قبل ما يشوف كلامك بالراحة خد بانر حلو مشكل جذاب ، ألوانه حلوة وحط اسمك علية واللوجو بشكل أنيق ، متعرفش اطلب المساعدة ، اشترى بانر من واحد اعمل أي حاجة المهم البانر يبقى جذاب .

معظم الفوتوغرافي المحترفين يستخدم صورة معجب بهي في البانر

أنا مش مع الاتجاه ده ، أنا مع الاتجاه الثاني

  

شايفين الدلع ، شايفين الجمال ، سهولة الأداء ،حلاوة المشهد ، جمال المنظر

وطبعا ممكن تحط اتجاهاتك في الصفحة " بتحب تصوير ايه ؟ " متخصص في تصوير ايه في كل مربع من دول .

الدور الثالث
الديسبلاى في الصفحة ، وده إلى بيكون موجود على الشمال وينزل مع كل بوسط للقراء ، وياريت مش كل شويه تغير فيه ، ممكن يكون رسمه ، شكل ، صورة ، حاجة مميزة كده أي حد يشوفها خلاص عرف أنها منك مش منتظر يشوف اسم الصفحة نفسه

نشوف أمثلة

 الدور الرابع

التخصص ، ياريت تتخصص في أمر ما أو أمرين بالكثير ، أفراح ومناسبات ، منتجات ودي فروعها كثير "فضة ، دهب ، بهارات ، زجاج .. الخ " ، أو حتى تصور طبيعة وشارع ، المهم أن صفحتك متبقاش كشري ، ويلا قرب قرب عندنا تصوير شارع ولاندسكيب و استرو وبطيخ حلو البطيخ شوف الشحات ده حاجة أخر نكد ، ده كشري سعتك ، كشري بايت ومحدش هياكله ، افصل تصويرك التجاري عن تصويرك المزاجي يا كبير .

الدور الخامس

المنشورات نفسها ، أبوس رأس جناب حضرتكم ، بلاش بوستات الغزل العفيف ، وصور من كل من هب ودب ، وأفلام قصيرة وطويلة ، وتعبيرات السماجة ، وبلاش سياسة خاااااااااااااااااااااالص يحرق السياسة والى يجي من ورآها مش مكانة حسابك زى الفل انشر من عليه إلى يعجبك ، صورك وبس ، إنتاجك الفني و الإبداعي وفقط ، سَمعني وفقط .

الدور السادس

إن تقدر تحط كلمات مع البوست ماشى ، بس كلمات قصيرة ، مفهومة هادفة ، بيت شعر عربي ، أو حتى دعوة حلوة ، معرفتش صورك وبس ومن غير اي كلام .

خلصنا العمارة كده وتوجيهاتنا ندخل على الأهم

الإعلان عن المنتج

-----------------
أهم خطوة بعد كل إلى أتعمل ده ، ومن غيرة ولا حاجة تحصل ، طيب ها أعلن فين ، أكيد نعلن على المكان إلى علية الناس نركز دلوقت على  "  " Facebook

الموقع ده منجم دهب بمعنى الكلمة ، بس للي يعرف يستغله ، طيب أحنا عندنا طريقين للإعلان على الفيسبوك عن طريق عمل إعلان أو انك تبقى مشهور وصحاب كثير بقى وصفحة فيها ملايين ، أحنا نختصر الطريق ونعلن مباشرة عشان نوصل للمرحلة الثانية للشهرة ، وساعتها تلاقى الدنيا ماشية لوحدها.

أخر خطوة للإعلان على الفيسبوك كيف وأين لنا فيها مقال أخر قريبا انتظرونا .