اموال - Money - 2

فلوس من التصوير " 2 "

اقوي فتور ممكن هيجي من ناحية التصوير لما متلاقيش جاب هامة ، هتصرف علية قد أية ، سنة أتنين وبعدين ؟

إن أحببت التصوير فيجب أن يحبك التصوير ، الحب ده معناه فلوس ، ايون أنت مادي وهو مادي وكلنا ماديين والتصوير لو مأكلش عيش سيبه " أتركة "  ، ودي حقيقة مجردة لازم تفهمها جنب الفن إلى أنت مؤمن بيه والرسالة إلى بتوصلها بلا بلا بلا .

تجيب فلوس منين

لازم نتفق أولا إن عشان تجيب فلوس لازم ولابد تكون بتخرج منتج كويس بل ممتاز ، بتغلفه كويس ، بتعملة دعاية كويسة ، وبعدين سيب الأرزاق على الرزاق بس بعد ما تتأكد انك عملت كل حاجة صح .

لحسن الحظ إن المنتج إلى معاك مش يفسد مع مرور الأيام ، بالعكس ممكن سعره يزيد ودي ميزة رائعة ، خصوصا انك مش محتاج مخزن بمساحة تخزن فيها شغلك التجار فاهمين المشاكل دية خصوصا في المنتجات الاستهلاكية المباشرة اللحوم والأسماك والسكر، السيارات ، الاجهزة ... الخ .

بس لازم اى منتج يوصل للناس ، الناس بس إلى تقدر تختار وتفرز مِن الجيد ومِن الوحش ، الجمهور يا عزيزي هو المراد الأخير ليك عبر تسويق شغلك ، هتقعد تقول فلان أنا أحسن منة وعلان بقى مشهور وأنا لا وترمى مبررات على علاقاته والكوسة وأصل وفصل مش ها نخلص ، أرمى الشماعة وأجمد كده أنت داخل على معركة لازم تكسب جزء منها  .

اهم شيء انك لازم تفهم مش ضرورى تخلص على كل إلى قدامك ، الساحة كبيرة جدا والمكاسب تكفى الجميع ، شغل أقتلك عشان جنية آو درهم انساه ، يعنى لا تسرق شغل حد ولا تشتم في حد ، خليك في حالك وركز فيك وده يرجعنا لنقطة مهمة جدا جدا جدا .

 *لا تتسرع اهدى هنتكلم عن النقطة دي قدام .

جودة المنتج .

عشان تنافس لازم يكون ليك جودة في المنتج إلى بتقدمة ، تصويرك مش لازم يكون مختلف عن الكل ، لكن لازم تبقى في جودة للمنتج ، تصويرك كويس بتفهم تصوير أصلا مش اضرب فلاش وأجرى ، فنبدأ مع بعض نتعلم كويس ونخرج منتج كويس وبعدين هنشرح مرحلة مهمة بعدها لاحقا.

تخرج منتج كويس ازاى – How To Make Good Product  

قبل اى حاجة لازم تحتك بالأخر ، ايون الأخر إلى منافس ليك ، أنا مقلتش تبقوا أعداء والله J ، وقلت الساحة كبيرة وتسع ألاف ، أوعى تصدق حد يقولك التصوير مهنة من لا مهنة له ، فكك من العقول دى ، احتك وشوفه وجرب نوع تصوير ، جرب كمان ، جرب تانى ، اشترك في مجموعة Egyptian Photographer  ونزل عليها صورك واطلب الرأي والتعليقات متحبطكش كمل ، كمل ، كمل .

اعمل حساب على G+ متعتمدش على الفيسبوك بس ، انستجرام مش بطال برضو ، في حاجة ثانية مهمة جدا بس هنأجلها للموضوع إلى بعد ده .

أتفرج على صور ناس في مجالك ، بتحب تصوير المنتجات اليوتيوب مليان فيديوهات ، اسأل على المجموعة على فيديوهات تصوير للمجال إلى تحبه : فاشون ، زفاف ، بورترية ... الخ .

يبقى تحتك بس متولدش حرارة ، جرب ، جرب ، تابع مصورين ناجحين ، جرب ، أتفرج على دروس ، جرب ، جرب .

مراحل إنتاج المنتج الحالي إلى معانا يمر بمراحل .

التصوير لازم تفهم أبعاد الكادر الحقيقي الكويس ، طيب هو ليه في كادر كويس وكادر جميل وكادر زى الهباب ، أكيد في سر ، ايون القواعد ، اكسرها بعد ما تفهمها وتتقنها ، الناس إلى بتحب تعاند يا جماعة ومفيش قواعد تركلنا على جنب وتنط السطور دى ، افهم أنواع العدسات الملائمة لنوع تصويرك ، تخيل إن راسك فيها عين سمكة أو عين عصفور هتشوف زى ما بتشوف دلوقت ، الإجابة ليك .

لازم تعرف العدسة المناسبة للكادرات إلى حاببها  .

بعد مرحلة قواعد التصوير بتيجي مرحلة قواعد الإضاءة ، ايون الإضاءة ليها قواعد صدقني ، وكل مجال ولية خامة الإضاءة الخاصة بيه واتجاها ، ناعمة ولا مباشرة ، فوق ولا تحت .

اى صورة في الكون أساسها ظل ونور ، لا نور لوحدة يعمل صورة ولا ظل لوحدة يعمل صورة ، والاثنين في صراع مستمر ولو واحد فيهم كسب - قول على صورتك وحشة من غير ما تفرجها لحد " إلا في حالات نادرة جدا مش حوارنا دلوقت يا عاطف " أنت مهمتك تصالح ده على ده وكل ما الصلح ده كان كويس كل ما صورتك كانت ناجحة ، صالح الظل والنور بلاش خناق مصدعين .

نيجي بقى لمرحلة التغليف

ايوه صورك محتاجة تغليف بس مش قبل التصوير تيجي تغلف الصورة ، خير أنت كويس !!

من خلال خبرتي في السنين الماضية لقيت شباب بيعمل ايديت " التغليف " على صور نص سوى ، طبعا الزبون يفتح الصورة ياكل ، تلبك معوى وش ، خفوا علينا الدكاترة أسعارهم عليت .

لو مبتعرفش تعمل ايديت " تغلف صورتك " أديها لحد بيعرف يعمل ايديت ، الايديت مجال تانى زى التصوير كده علم لوحدة في الألوان ودرجات الإضاءة والظل ، ادوبى كتر خيرها رحمتنا من الغرف المظلمة بتاعت زمان كانت أيام والفيلم صور فيه تتحرق وصور تطلع بشعة وعملت لنا برامج مظلمة بقصد برامج ايديت ، أشهر برامج الايديت  LightRoom  ، أوعى حد يقول الفوتوشوب أحسن منة إطلاقا سعتك الفوتوشوب ده برنامج تصميم مش تحميض صور ، ايون LightRoom  إلى بيحمض الصور زى الغرفة المظلمة بتاعت المصورين زمان بس العصر اختلف ، ولان العصر اختلف فزوق المتلقي أو الزبون كمان اختلف ، ركز أنا مش حابب أشوف صورة ضاربها الأخضر أو الأزرق وتقولي أية رأيك ، خير أنت كويس ؟!

طيب معندكش حد يعمل ايديت ، يبقى تتعلم ايديت ، تاخد نفسك كده وعلى اليوتيوب وتتعلم ايديت ، أنت في عصر سهل توصل لأي معلومة بس أنت إلى تكسل ساعات تفتح موقع جديد ، بالمناسبة عصر المعلومات خلص إحنا في عصر جديد النانو ، فبلاش تعيش في عصر الذرة حضرتك كده أنت في ال 40 من القرن الماضي والريحه وحشة .

المصور المصري عمرة ما بخل بمعلومة لأي مصور هاوي أو محترف - ايديت ، قواعد تصوير ، إضاءة ، حاول تحتك بيهم وبخبراتهم و بعد ما تغلف صح عندنا موضوع تانى قريبا جدا تابع معانا .

منتظرين رأيك .

أسرة المصور المصري .